How yu do Miss Lou, we all miss yu fi true,
In fac mi offen wondah if yu did deh ya, if yu woulda rite bout dis heapa dansa, dat dis a jiggle up demselves.
Ask pardon Miss Lou, cah mi nah go talk sweet, mi jus aguh tell yu exactly how dem a dweet outta street,
Mi Aunt Merkle good good dawta name Latoya, everybody now call har Latty Goodaz,
An har cousin Sasha, hear ya, she is none odda dan Sasha Hottaz.
Miss Lou, me really miss yu fi true, but all your long frock woulda just hol yu back.
Maam yu wah fi see dem climb, bum flick, bubble an wine,
Dem all have a move name Six Thirty, weh dem bend ova like a clock an behave flirty flirty. Mas Ran woulda love fi see dem One Drop an Head Top, but then again fidget say me even jus say dat!
See ya, dem all a Signal di Plane an Call Dung di Rain, mi really feel say di next day di dancer dem inna nuff pain,
Ma’am, when di selecta play certain song everybody a run up pon dung, all mi nearly pitch a grung!
Miss Lou neva figet say mi miss yu fi true, But ahmm, mi have a likkle confession, mi kinda start fi enjoy di nightly Dancehall sessions,
But nuh worry you an Mas Ran would be proud, di way me a danse good good good, di selecta dem say mi ting tun up LOUD!
By Maria A. Hitchins